The One New Heart Tanzania
Tukio · 15 Novemba 2026

The One New Heart Tanzania kwenye Kongamano la Dunia la Ugonjwa wa Moyo wa Rumatiki huko Perth, Australia

Huko Perth tulieleza tulichojifunza kwenye kazi zetu mashuleni Tanzania: mtoto akigundulika kuwa na ugonjwa wa moyo wa rumatiki, ni lazima apate matibabu ambayo familia yake inaweza kuyamudu na huduma endelevu.

Photograph from: The One New Heart Tanzania at the World Congress on Rheumatic Heart Disease in Perth, Australia

The One New Heart Tanzania imesisitiza umuhimu wa kuunganisha ugunduzi wa mapema wa ugonjwa wa moyo wa rumatiki na matibabu ambayo familia zinaweza kuyamudu pamoja na huduma endelevu kwa watoto. Hii ni baada ya kushiriki Kongamano la Dunia la Ugonjwa wa Moyo wa Rumatiki lililofanyika Perth, Australia, kuanzia tarehe 11 hadi 14 Novemba 2026.

Shirika liliwakilishwa na Mkurugenzi Mtendaji wake, Pietro Chille, ambaye aliwasilisha bango (poster) lenye kichwa “Mzigo wa Ugonjwa wa Moyo wa Rumatiki kwa Wanafunzi Tanzania.” Wasilisho hilo lilieleza uzoefu wetu wa kazi mashuleni na changamoto ambazo watoto na familia zao hukutana nazo ili kupata vipimo na matibabu kwa wakati.

Kongamano hilo liliandaliwa kwa pamoja na World Heart Federation na National Heart Foundation of Australia. Liliwakutanisha wataalamu wa afya, watafiti, watunga sera, wawakilishi wa wagonjwa na watetezi ili kuimarisha juhudi za dunia dhidi ya ugonjwa wa moyo wa rumatiki.

Matokeo makubwa ya kongamano ni kupitishwa kwa Azimio la Perth. Azimio hili linaweka lengo la dunia la kutokomeza homa ya baridi yabisi na ugonjwa wa moyo wa rumatiki kama matatizo ya afya ya jamii ifikapo mwaka 2040.

Pietro Chille holds the Spark Tank 2026 People’s Choice Award runner-up plaque at the World Congress on Rheumatic Heart Disease
Pietro Chille beside The One New Heart Tanzania poster, Screening is only the beginning, at the World Congress on Rheumatic Heart Disease

Kupeleka uzoefu wa Tanzania kwenye mjadala wa dunia

Kwa The One New Heart Tanzania, kongamano hili lilikuwa nafasi ya kueleza uzoefu kutoka kwenye jamii ambazo watoto bado wako hatarini kupata magonjwa ya moyo yanayozuilika, na ambako kupata matibabu ya kibingwa bado ni changamoto.

Bango letu lilibeba ujumbe mfupi lakini muhimu: Uchunguzi ni mwanzo tu.

Kwenye moja ya kazi zetu za outreach tulikutana na msichana wa miaka 15 mwenye mitral stenosis kali, yaani mlango mmoja wa moyo kuwa mwembamba sana. Ingawa aligundulika miaka mitatu kabla na madaktari walishauri afanyiwe matibabu, familia yake haikuweza kumudu gharama.

Tulipokutana naye, alikuwa anazidi kupata shida ya kupumua. Hali hiyo iliathiri shughuli zake za kila siku na mahudhurio yake shuleni.

Kisa chake kinaonyesha changamoto kubwa hapa Tanzania. Kumgundua mtoto mwenye ugonjwa wa moyo ni muhimu, lakini kugundua peke yake hakuokoi maisha kama familia haiwezi kumudu matibabu yanayotakiwa.

Kwa hiyo wasilisho letu lilisisitiza umuhimu wa kuimarisha safari nzima ya huduma: kuanzia uelewa na uchunguzi, hadi vipimo vya kuthibitisha ugonjwa, rufaa, matibabu ambayo familia zinaweza kuyamudu, kinga ya kuzuia ugonjwa usirudi na ufuatiliaji wa muda mrefu.

Pietro Chille discusses The One New Heart Tanzania poster with a delegate during the poster session
Pietro Chille points to Tanzania on a world map of rheumatic heart disease work at the congress

Azimio la Perth lina maana gani kwa Tanzania

Azimio la Perth linasisitiza umuhimu wa kuzuia ugonjwa wa moyo wa rumatiki, kurahisisha upatikanaji wa vipimo vya mapema na kuhakikisha watu ambao tayari wanaishi na ugonjwa huu wanapata huduma sahihi bila kukatika.

Linataka programu za kitaifa za kinga ziimarishwe, dawa muhimu za antibiotiki zipatikane kwa uhakika, mifumo ya kufuatilia wagonjwa iboreshwe na uwekezaji kwenye huduma za afya uongezwe. Pia linasisitiza kwamba jamii zinazoathiriwa na ugonjwa huu zishiriki kupanga programu zinazolenga kuzisaidia.

Vipaumbele hivi vinaihusu Tanzania moja kwa moja. Hapa, gharama, uhaba wa huduma za vipimo na ugumu wa kufikia huduma za kibingwa bado vinawaathiri watoto na familia zao.

Pia vinaendana na kazi tunayoendelea nayo kupitia Colors to Save Hearts, programu inayoongeza uelewa wa ugonjwa wa moyo wa rumatiki kwa wanafunzi na jamii, inayohamasisha watu kutafuta huduma za afya mapema na inayoimarisha uhusiano kati ya shule na vituo vya afya.

Kongamano limetukumbusha funzo muhimu la kazi yetu: maendeleo ya kudumu yanahitaji zaidi ya outreach moja moja. Yanahitaji mifumo imara ya afya katika maeneo yetu, jamii zenye uelewa, njia za rufaa zinazoaminika na ushirikiano wa kudumu.

Pietro Chille with World Heart Federation staff holding the Colors to Save Hearts Quarter 1 Report and colouring book at the World Heart Federation stand
Pietro Chille with a delegate at the World Heart Federation stand

Kutoka kwenye maarifa hadi vitendo

Kwa mujibu wa Azimio la Perth, duniani kote takriban watu milioni 55 wanaishi na ugonjwa wa moyo wa rumatiki na zaidi ya 370,000 hufariki kila mwaka kwa sababu yake.

Pamoja na maendeleo ya sayansi ya tiba, vifo vingi kati ya hivi bado vinaweza kuzuilika.

Akitafakari kuhusu kongamano, Pietro Chille alisisitiza kwamba ugonjwa wa moyo wa rumatiki haupaswi tena kuonekana kama jambo lisiloepukika kwa sababu ya umaskini, hali duni ya maisha au mahali mtu anapoishi.

Changamoto ni kuyageuza maarifa yaliyopo kuwa vitendo kupitia mifumo imara ya afya, uwekezaji endelevu na ushiriki wa kweli wa jamii.

Azimio la Perth pia limeweka ahadi ambazo zitapitiwa kwenye Kongamano la Dunia lijalo mwaka 2029. Hiyo itakuwa nafasi ya kupima hatua zilizopigwa badala ya kurudia ahadi zilezile.

Pietro Chille with two delegates at the World Congress on Rheumatic Heart Disease
Pietro Chille holds a model heart valve with an exhibitor at the congress

Ahadi yetu

Kama mwanachama wa World Heart Federation, The One New Heart Tanzania itaendelea kushirikiana na taasisi za afya, shule, jamii na wadau ili kuboresha kinga, ugunduzi wa mapema na matibabu ya magonjwa ya moyo kwa watoto nchini Tanzania.

Kushiriki kwetu Perth kumeonyesha tena umuhimu wa kuunganisha uzoefu wa hapa nyumbani na ushahidi wa kisayansi wa dunia, na kuhakikisha ahadi za kimataifa zinaleta mabadiliko ya kweli kwenye jamii zilizoathirika zaidi.

Lengo letu si kugundua tu watoto wengi zaidi wanaoishi na ugonjwa wa moyo wa rumatiki. Lengo ni kusaidia kila mtoto anayegundulika apate njia ya kweli ya kufikia huduma anayohitaji.

Safari ya kutokomeza ugonjwa wa moyo wa rumatiki inaanza na kinga, lakini ni lazima pia iwahusishe wale ambao tayari wanaishi na ugonjwa huu na hawawezi kusubiri.