Mission ya Cath Lab Tanzania imekamilika - wiki ya mambo ya kwanza

Kifo cha Rais wetu mpendwa Dkt. John Pombe Magufuli kilichelewesha kuanza kwa mission kwa wiki moja ya maombolezo ya kitaifa, na wagonjwa tuliotarajia waje kufanyiwa matibabu hawakuweza kusafiri. Mtoto mmoja alikuwa na nimonia kali, hivyo ikabidi matibabu yake yasitishwe.

Kama ilivyo kawaida unapoanzisha programu mpya, kulikuwa na ucheleweshaji mwingi na matatizo mengi ya kutatua, na tulitumia mbinu za ubunifu tulizojifunza kwa miaka mingi.

Siku ya kwanza, tuliweza kuanza na mgonjwa wa kwanza saa nane na nusu mchana. Tulikuwa na mashine ya kusukuma dawa ya contrast (contrast injector), lakini ilikuwa haijawahi kutumika na ilikosa kifaa kimoja. Tulikuwa na transducer 1 ya kupima presha, lakini iliacha kufanya kazi miezi 2 iliyopita. Baadhi ya wagonjwa hawawezi kutibiwa bila vifaa hivi. Ndani ya siku 3, tuliweza kuwatibu wagonjwa 3 kwa mafanikio. Kwa timu ya kimataifa hili lilionekana jambo dogo sana, lakini kwetu sisi timu ya Tanzania, tuliokuwa tukifanya kazi kwa miaka mitatu ili jambo hili litimie, lilikuwa jambo kubwa mno lililotupa matumaini makubwa kwa siku zijazo.

Watoto wachanga wawili waliokuwa wagonjwa, wenye utapiamlo na moyo kushindwa kufanya kazi kwa kiasi kikubwa, walitibiwa matatizo ya moyo wao kwa kutumia vifaa vikubwa sana.

Mtoto mchanga wa tatu alikutana nasi kwa mpango wa Mungu. Aliletwa jana jioni mwisho wa siku ili moyo wake uchunguzwe, lakini pia tukagundua kuwa ana maji mengi sana yaliyojikusanya kuzunguka moyo wake. Bila kufanyiwa matibabu asingeweza kuishi zaidi ya siku chache. Alitakiwa kuonwa kwenye kliniki moja iliyo mbali baada ya siku chache, lakini wazazi wake walisikia kwamba tupo, wakamleta kwetu badala yake.

Tuliweza kuyatoa maji yote (hata bila vifaa vinavyotumika kwa kawaida), na akaonekana amepata nafuu kubwa. Jambo hili lisingeweza kutokea mahali pengine popote. Haya yote yalikuwa mambo ya kwanza kwao.

Baada ya kukamilisha matibabu yote kwa mafanikio, Dkt. Mary Porisch, daktari bingwa wa moyo wa watoto (interventional pediatric cardiologist) kutoka timu ya For Hearts and Souls, alisema:

Tunaishukuru kwa dhati timu nzima kwa kufanikisha mission hii ya kuokoa maisha ambayo hatutaisahau. Asanteni sana!